Aqtóbe oblysyna jumys sapary aıasynda Parlament Májilisiniń depýtattary Gleb Shegelskıı, Quralaı Qaraken, Danııa Espaeva Qazaqstan Respýblıkasyndaǵy gazben jabdyqtaýshy iri kompanııa – «QazTransGazAımaq» AQ-nyń Aqtóbe óndiristik fılıalynda boldy, dep habarlaıdy Májilistiń baspasóz qyzmeti.
Kompanııanyń fılıaly 2007 jyly qurylǵan. О́tken jyly júzege asqan gaz kólemi eki mıllıon tekshe metrden asty.
2015-2020 jyldarǵa arnalǵan, jalpy somasy 21,8 mıllıon teńgeni quraıtyn ınvestısııalyq baǵdarlama tabysty júzege asýda. Aqtóbe oblysy ákimdigimen bekitilgen yntymaqtastyq týraly memorandým sheńberinde Yrǵyz, Oıyl, Áıteke bı aýdany ortalyqtary, sondaı-aq Qosestek, Bogoslovka, Taldysaı, Eńbek, Altyndy, Aqqudyq, Jaısan eldi mekenderine kógildir otyn tartylǵan.
Kompanııanyń Aqtóbe óndiristik fılıalynyń dırektory Bahtııar Izbasarov atap ótkendeı, birinshi qańtardaǵy jaǵdaı boıynsha gaz qubyrynyń uzyndyǵy 3 502 kılometrdi quraıdy, 202 603 tutynýshy bar. 7 qala men 102 eldi mekendi qosqanda, oblys turǵyndarynyń 87 paıyzǵa jýyǵy gazben qamtamasyz etildi. Eki jyl ishinde taǵy 21 jobany júzege asyrý, al odan ári barlyq aýylǵa gaz qubyrlary tartý josparlanýda.
Májilis depýtattaryna fılıaldyń halyqqa qyzmet kórsetý operasıalyq qyzmeti jumysy tanystyryldy. Elektrondyq júıe nysandardy gazdandyrý úshin abonentterge tehnıkalyq sharttar jáne turmystyq gaz eseptegish ornatý úshin ótinish resimdeýge jáne t.b. múmkindikter beredi. Budan keıin olar óndiristik tehnıkalyq bólim, kúrdeli qurylys bólimi jumysymen tanysty.
«Fılıaldyń keleshegi bar, ol úshin oblys basshylyǵymen memorandým bekitilgen. Bizge oblystyq máslıhat depýtattary bıznes óziniń ınvestısııalyq baǵdarlamasyn boljaý úshin jylyna bir retten kem emes tarıfterdi ózgertýdi qarastyrý týraly ótinish bildirdi», - dedi kezdesý qorytyndysy boıynsha Gleb Shegelskıı.
Kelesi kezekte depýtattar qýattylyǵy saǵatyna 30 myń tekshe metr avtomattandyrylǵan gaz taratý stansasyna at basyn burdy. Alǵadaǵy gaz taratý stansasy eki juma buryn paıdalanýǵa berilgen. Depýtattardyń pikirinshe, bul nysan Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynda belgilengen mindetterge tolyǵymen jaýap beredi.